اإزاي تبدأ كمساهم (Contributor) في Kubernetes Open Source Community

اإزاي تبدأ كمساهم (Contributor) في Kubernetes Open Source Community
معلش اتأخرت عليكم بس اديكم شايفين الجنان اللي احنا فيه!!

لو نفسك تشتغل في Cloud Native أو DevOps،أو system/infra engineer المساهمة في Kubernetes من أقوى الحاجات اللي ممكن تفتحلك أبواب كبيرة وكتيرة.

في الثريد ده هنشرح إزاي تبدأ في الـK8s Community، حتى لو ما عندكش خبرة سابقة في المساهمة في ال open-source.

Kubernetes
مش مجرد مشروع open-source وخلاص، ده من أكبر المشاريع في العالم، تقريبا رقم اتنين بعد Linux. وبيشارك فيه مهندسين من شركات زي Google وMicrosoft وAmazon و Red Hat وغيرهم كتير.
بس الأهم من كده، إن المجتمع منظم، داعم، وبيشتغل بشكل مفتوح وشفاف. وده بيخليه بيئة ممتازة تتعلم وتنمو فيها.

قبل ما تبدأ، اسأل نفسك أنت حابب تساهم بإيه. مش لازم تكتب كود عشان تكون مساهم. ممكن تشتغل في الترجمة او كتابة docs, ممكن تساعد في ادارة ال release اللي بيبقي ٣ مرات في السنة او تكتب tests h او تعمل code review او حتي تفتح issue لو لاقيت حاجة مش شغالة. ممكن كمان تكتب blogs اوتشتغل مع الناس اللي بتقدم دعم للcommunity.

لو ناوي تشتغل في الكود، هتحتاج تبقى كويس Git وGitHub، وعندك فكرة أساسية عن Kubernetes كمستخدم، ومعرفة بلغة Go هتكون مفيدة.
هجط لينكات في اخر الثريد ل go و Kubernetes بس فعلا ممكن تلاقي مليون مصدر تختار وتتعلم منهم ببلاش.

أول خطوة عملية هي إنك تفهم المشروع من جوه.
ابدأ من الريبو ده:
github.com/kubernetes/community
هتلاقي فيه خريطة الفرق وال community كله ماشي ازاي، مجموعات العمل (SIGs) اللي هوا اختصار ل Special Interest group، وهتلاقي فيه مواعيد الاجتماعات وإزاي تتواصل، وإيه القواعد الأساسية اللي بنشتغل بيها.

بصراحة ناس كتير اوي اشتغلت علي الريبو دي وليهم فضل كبير.

زي ما قلت, كل جزء في Kubernetes مسؤول عنه مجموعة اسمها SIG – Special Interest Group.
فيه مجموعات لكل حاجة بقي : CLI, Docs, Networking, Security, Scheduling وغيرها كتير.
لو لسه بتبدأ، أنصحك تبدأ بمجموعة sig-docs أو sig-contribex أو sig-release لأنهم بيرحبوا بالمساهمين الجدد وبيشتغلوا على حاجات مفيدة وسهلة الفهم نسبيًا.

التواصل بيحصل كله على Slack. هتدخل على slack.k8s.io وتسجل حساب.
كل مجموعة ليها قناة خاصة، وهتلاقي كمان قناة اسمها kubernetes-newcomers مخصصة للناس اللي لسه بتبدأ.

أول مساهمة ليك مش لازم تكون كبيرة. ممكن تبدأ بتعديل في docs، توضيح نقطة، أو حتى إصلاح خطأ إملائي.
بعد كده، لما تتعود على طريقة الشغل، تقدر تمسك مهام أكبر من خلال GitHub Issues المتعلّمة بـ “good first issue”.

أهم حاجة ان وأنت شغال، خليك ملتزم بأسلوب الcommunity:
- اسأل قبل ما تبدأ، التزم بالـ Code of Conduct، واستحمل إن code review هياخد وقت ودا مش علشان حد مستقصدك بس علشان كل سطر بيتكتب, الناس هتاخد باله منه لمدة طويلة جدا. الcommunity ضخم، والمساهمات بتتراجع بعناية، مش بسرعة.

الهدف من المساهمة مش بس pull request وخلاص.
أنت بتتعلم تشتغل مع ناس من خلفيات مختلفة، بتفهم مشروع حقيقي بيشتغل على نطاق واسع، وبتبني علاقات وفرص لمستقبلك المهني.

اخر حاجة هشارك شوية مراجع:
- Kubernetes doc: kubernetes.io/docs/home
- golang: go.dev/tour/welcome/1